Осы аптада қазақ тілді газет пен сайттар мәдени тақырыпта не жазған екен? Назар аударыңыздар.

Көңіл күнделігі

Қалай десек те, бәрібір алпысыншы жылдары әдебиетке келген Тұмағаңдар мен олардың замандастары – бақытты ұрпақ. Шығармашылықпен емін-еркін айналысу олардың негізгі жұмысы болды. Ол уақыттары бір жинағың шықса, алатын ақшаң бір жыл емін-еркін өмір сүруге молынан жететін.
Әлі есімде. Әкем марқұм бір жылдары жұмыссыз қалды. Сонда әкемнің баспалардан шығатын кітаптарға рецензия жазғанына төлеген тиын-тебеніне, газет-журналдарға шыққан өлеңдері мен мақалаларының қаламақысына күн көрген кезіміз болды (жалғасы).

Атақты театрлар

Ковент-Гарден – Британия астанасы Лондонның белгілі ауданы. Танымал театрға аудан атауы берілген. 1732 жылы өз шымылдығын ашқан театр бірден танымал болып, Лондонның ең үздік өнер ордасына айналды. Ковент-Гарден 1808 және 1856 жылдары өртке оранды. 1858 жылы қазіргі ғимарат тұрғызылып, 1990 жылы күрделі жөндеуден өткізілді (толығымен).

Таңдайынан бал тамған тенор еді...

Талай жезтаңдай әншіні, дәулескер күйшіні, таңдайына жыр тұнған ақынды туғызған қазақ даласы ән салғанда дауысы алты қырдан асатын кең тынысты опера әншілеріне де кенде емес. Қазақтың Абайын,  Біржан-Сарасын әлемдік классиканың қатарына қосып, төл операмыздың жауһарына айналдыруда үлкен еңбек сіңірген өнер қайраткерлерінің есімі елеусіз қалмауы тиіс. Қадым ғасырлар қойнауынан бастау алатын ұлтымыздың аса бай ән өнерінде өзіндік орны бар, қазақ операсы мен классикалық музыкасының дамуына өлшеусіз үлес қосқан тұлғаларымыздың бірі – Байғали Досымжанов (жалғасы).

Әрбір рөл - актердің бақыты

- Актер ретінде қандай рөлді ойнауды армандайсыз?

- Жалпы, әрбір актер Шекспирдің «Отеллосын», «Король Лирін», «Гамлетін» ойнағысы келеді. Бірақ олардан бұрын етек-жеңімізді жинап, өз жыртығымызды жамай білген жөн секілді. Қазақта қағаз бетіне хат болып түспей, еңбегі жазылмай, есімі ескерілмей қалған тұлғалар баршылық. Неге бізге сондай тұлғаларымыздың сахналық образын жасамасқа? Егер мұндай туындылар жазылып, сахналанып жатса, нұр үстіне нұр болар еді. Мысалы, Мұстафа Шоқай, Ахмет Байтұрсынов, Мағжан Жұмабаев сынды көптеген дарынды ұлдарымызға арнап пьеса жазылса, тамаша қойылымдар дүниеге келетін еді ғой (толығымен).

ШЫҒЫС «МЫҢ БІР ТҮННЕН» ЖАҢЫЛЫП ҚАЛҒАНДАЙ КӨРІНЕДІ

Адамзатқа ортақ рухани мұралардың кейбірі өз топырағымыздан жаралғандай көрінетіні бар. Соның бірі «Мың бір түн» хикаясы десек, елең етпейтін қазақ жоқ. Бұл хикаяның көлемі туралы ілгеріде айтылып жүрген әңгімелердің өзі де аңыз сияқты көрінеді. Біреулер 200 томнан тұрады десе, екінші біреулер қоржынның қос басына бөліп артқан кезде қашар көтере алмайтындай салмағы бар деп айтады (жалғасы).

«Қыран бүркіт не алмайды, салса баптап…»

Жақында Алматы облысы Еңбекшіқазақ ауданы Нұра ауылының «Илантау» бауырында «Сонар-2012» республикалық құсбегілер жарысы өткізілді. Иісі қазаққа ортақ өнер сайысына Ақмола, Қарағанды, Жамбыл, Шығыс Қазақстан, Оңтүстік Қазақстан облыстары мен Астана, Алматы қалаларының командалары қатысты. Саятшылық атадан балаға мұра болып келе жатқан өнердің бір түрі екені белгілі. Бүркітшілер сайысы болатыны туралы хабар жетісімен, саятшылық өнердің дәл осы түрін көруге асықтық. Себебі «Қан сонарда бүркітші шығады аңға» деп басталатын Абай атамыздың өлеңін бала кезден жаттап өскендікі ме, кө­ңіліміздің бір түкпірінде саятшылық­қа деген қызығушылық та жататын еді (жалғасы).